Cəmiyyət · 19 oktyabr 2026

Adnan Əhmədzadənin həbs müddəti daha 6 ay artırılıb

İqtisadi təhlükəsizliyə təxribat və mənimsəmədə təqsirləndirilən Adnan Əhmədzadənin həbs müddəti məhkəmə qərarı ilə daha 6 ay uzadılıb.

Dövlətin iqtisadi təhlükəsizliyinə təxribat törətməkdə və mənimsəmə hallarında təqsirləndirilən tanınmış iş adamı Adnan Əhmədzadənin 13 aylıq həbs müddətinin başa çatması ilə əlaqədar yeni məhkəmə qərarı qəbul edilib.

İstintaqı aparan Dövlət Təhlükəsizliyi Xidməti məhkəməyə müraciət edərək, xüsusilə ağır cinayət faktları üzrə aparılan irihəcmli araşdırma üçün mövcud müddətin yetərli olmadığını bildirib. Təqdim edilən vəsatətdə əlavə sübutların toplanması zərurəti əsas gətirilərək təqsirləndirilən şəxsin həbs müddətinin uzadılması istənilib.

Səbail Rayon Məhkəməsi istintaq orqanının müraciətini əsaslı hesab edib və vəsatəti təmin edib. Hakimin çıxardığı qərara əsasən, Adnan Əhmədzadə barəsində seçilmiş həbs qətimkan tədbirinin müddəti qanunvericilikdə nəzərdə tutulan son həddə qədər — yəni 6 ay artırılıb.

Qanunvericiliyin tələblərinə görə, xüsusilə ağır cinayətlər üzrə ibtidai istintaq zamanı şəxsin həbsdə saxlanılmasının standart son həddi 13 aydır. Lakin müstəsna hallarda bu müddətin 19 aya qədər artırılmasına icazə verilir.

Qeyd edək ki, əvvəllər SOCAR-da rəhbər vəzifələrdə çalışmış və sonradan beynəlxalq miqyasda neft maqnatı kimi tanınmış Adnan Əhmədzadə ötən ilin sentyabr ayında DTX tərəfindən saxlanılaraq həbs edilib.

Mənbə: Lent.az — Azərbaycan