Dünya · 17 oktyabr 2026

BMT-nin yeni Baş katibinin seçilməsi ilə bağlı razılıq əldə olunmayıb

BMT Təhlükəsizlik Şurasında keçirilən qeyri-rəsmi səsvermədə yeni Baş katib postuna iddia edən yeddi namizəddən heç biri daimi üzvlərin tam dəstəyini qazana bilməyib.

BMT Təhlükəsizlik Şurasında növbəti Baş katibin müəyyənləşdirilməsi ilə bağlı keçirilən son qeyri-rəsmi səsvermədə yeddi namizəddən heç biri veto hüququna malik beş daimi üzvün hamısının dəstəyini qazana bilməyib. Bu vəziyyət, təxminən 10 ildir təşkilata rəhbərlik edən Antonio Quterreşin yerinə yeni namizədlərin irəli sürülməsi ehtimalını gündəmə gətirib.

Şuranın 15 üzvü namizədləri dəstəkləmək, əleyhinə olmaq və ya rəy bildirməmək formatında səs veriblər. Əvvəlki beş sorğudan fərqli olaraq, bu gizli səsvermədə ABŞ, Rusiya, Çin, Böyük Britaniya və Fransanın səslərini fərqləndirmək üçün ilk dəfə qırmızı bülletenlərdən istifadə olunub. Anonim mənbələrin bildirdiyinə görə, lider mövqedə olan hər üç namizəd daimi üzvlərdən ən azı iki qırmızı veto xarakterli mənfi səs alıb.

Səsvermə cədvəlinin ön sıralarında Kosta-Rikanın keçmiş vitse-prezidenti və BMT-nin ticarət rəhbəri Rebeka Qrinspan, MAQATE rəhbəri Rafael Qrossi və Qayananın BMT-dəki səfiri Karolin Rodriqes Birkett yer alıb. Qrinspan 9 müsbət səslə birinci olsa da, hər üç iddiaçıya daimi üzvlər tərəfindən maneə yaradılıb. Digər namizədlərdən Ekvador nümayəndələri Mariya Fernanda Espinosa və İvon A-Baki siyahının sonunda qərarlaşıb, afrikalı namizədlər Olara Otunnu və Maki Sall isə 10 mənfi səs toplayıb.

ABŞ rəsmiləri hazırkı namizədlərin heç birinin Tramp administrasiyası üçün ideal olmadığını, Vaşinqtonun BMT-də köklü islahatlara kökləndiyini bildirsələr də, bu şəxslərdən birini dəstəkləmək variantını tam istisna etməyiblər. ABŞ səfiri Mayk Uolts təşkilatın əsas diqqətini yenidən sülh və təhlükəsizliyə yönəldəcək güclü liderə ehtiyac duyulduğunu vurğulayıb.

Diplomatlar bildiriblər ki, qırmızı bülletenlərlə növbəti səsvermə gələn həftə keçiriləcək. Həm ABŞ səfiri Uolts, həm də Rusiyanın BMT-dəki səfiri Vasili Nebenzya prosesin ilin sonuna qədər başa çatacağına ümid etdiklərini bildirərək, yeni namizədlərin ortaya çıxması ehtimalını istisna etməyiblər.

Mənbə: APA — Azərbaycan xəbərləri