Azərbaycan · 13 oktyabr 2026

BVF Azərbaycan iqtisadiyyatına dair yeni proqnozlarını açıqlayıb

Beynəlxalq Valyuta Fondu Azərbaycanın iqtisadi artımı, inflyasiya göstəriciləri və işsizlik səviyyəsi ilə bağlı növbəti illər üçün gözləntilərini yeniləyib.

Beynəlxalq Valyuta Fondunun (BVF) açıqladığı hesabata əsasən, Azərbaycanda ümumi daxili məhsulun (ÜDM) 2026-cı ildə 1,7 faiz, 2027-ci ildə isə 2,3 faiz səviyyəsində artacağı gözlənilir. Qurumun son qiymətləndirmələrinə görə, 2026–2027-ci illər üzrə ölkə iqtisadiyyatının orta illik artım tempi 2 faiz təşkil edəcək.

Fondun may ayında dərc etdiyi göstəricilərlə müqayisədə artım proqnozlarında azalma qeydə alınıb. Belə ki, ÜDM artımı üzrə gözləntilər 2026-cı il üçün 0,5 faiz bəndi, 2027-ci il üçün isə 0,2 faiz bəndi aşağı salınıb.

Hesabatda inflyasiya göstəriciləri ilə bağlı yenilənmiş rəqəmlər də yer alıb. BVF Azərbaycanda orta illik inflyasiyanın 2026-cı ildə 5,8 faiz, 2027-ci ildə isə 5,6 faiz olacağını proqnozlaşdırır. May ayındakı təxminlərlə müqayisədə 2026-cı il üzrə inflyasiya gözləntisi 0,2 faiz bəndi azaldılsa da, 2027-ci il üçün bu göstərici 1,4 faiz bəndi yüksəldilib. Əvvəlki hesabata görə bu rəqəmlər müvafiq olaraq 6 faiz və 4,2 faiz səviyyəsində idi.

Sənəddə əmək bazarına dair proqnozlar da təqdim edilib. BVF-nin hesablamalarına əsasən, ölkədə işsizlik səviyyəsi 2026-cı ildə dəyişməyərək 2025-ci ilin göstəricisi ilə eyni – 5,3 faiz səviyyəsində qalacaq. 2027-ci ildə isə işsizliyin 5,2 faizə enəcəyi gözlənilir.

Mənbə: APA — Azərbaycan xəbərləri