Azərbaycan · 11 oktyabr 2026

Milli QHT Forumu məktəblərdəki geyim qaydaları və xarici informasiya hücumları ilə bağlı bəyanat yayıb

Azərbaycan Milli QHT Forumu təhsil müəssisələrindəki geyim qaydalarının siyasiləşdirilməsi cəhdlərini pisləyərək ictimaiyyəti xarici informasiya təxribatlarına qarşı ayıq-sayıq olmağa çağırıb.

Azərbaycan Milli QHT Forumu son vaxtlar İran və digər xarici ölkələrin internet resurslarında ölkənin dünyəvi dövlətçilik modelini hədəfə alan təbliğatın aparıldığını bildirib. Bəyanatda qeyd olunur ki, şəriət idarəçiliyini təşviq edən və ictimaiyyətdə çaşqınlıq yaratmağa çalışan bu cür informasiya hücumları cəmiyyətdə süni qarşıdurma yaratmaq məqsədi güdür.

Təşkilat xüsusilə məktəblərdə şagird və müəllimlərin geyim qaydaları ilə bağlı müzakirələrin məqsədli şəkildə siyasiləşdirilməsini və dini müstəviyə daşınmasını qətiyyətlə pisləyib. QHT Forumu yüzlərlə qeyri-hökumət təşkilatını birləşdirən qurum kimi cəmiyyəti milli maraqlara və konstitusion dəyərlərə yönəlmiş bu cür təxribatlara qarşı ayıq olmağa səsləyib.

Bəyanatda vurğulanır ki, təhsil ocaqlarında hamı üçün nəzərdə tutulan vahid geyim qaydaları qanunvericiliyin tələbidir və bu normalar dini dəyərlərə qarşı yönəlməyib. Nazirlər Kabinetinin müvafiq qərarına əsasən, dünyəvilik prinsipinə uyğun olmayan elementlərdən istifadəyə yol verilmir və bu tələblər həm şagirdlərin vahid formasını, həm də müəllimlərin peşəkar görünüşünü təmin etməyə xidmət edir.

QHT Forumu məktəblərin dini və ideoloji təsirlərdən uzaq, elmin və azad düşüncənin inkişaf etdiyi məkanlar olmalı olduğunu bildirərək qaydaların şəffaf və bərabər tətbiqini dəstəklədiyini bəyan edib. Eyni zamanda, Azərbaycanın dünyəvi dövlətçilik xəttinin xalqın şüurlu seçimi olduğu, ölkəni cəhalətə və dini idarəçiliyə sürükləmək istəyənlərin niyyətlərinə çata bilməyəcəyi vurğulanıb.

Sonda vətəndaş cəmiyyəti institutları, ziyalılar, müəllimlər, valideynlər və media nümayəndələri dini həssaslıqlardan istifadə edən təbliğatlara qarşı prinsipial mövqe tutmağa dəvət edilib. Qeyd olunub ki, məsələlərdə əsas meyar emosiyalar deyil, ölkə qanunvericiliyi və milli maraqlar olmalıdır.

Mənbə: Axar.az — Azərbaycan