Cəmiyyət · 18 oktyabr 2026

Naxçıvanda dörd avtomobil toqquşub: 5 nəfər xəsarət alıb

Naxçıvan şəhərində dörd avtomobilin iştirakı ilə baş verən zəncirvari yol-nəqliyyat hadisəsi nəticəsində 5 nəfər xəsarət alaraq xəstəxanaya yerləşdirilib.

Naxçıvan şəhərində bir neçə nəqliyyat vasitəsinin toqquşması ilə nəticələnən ağır yol qəzası qeydə alınıb.

Hadisə şəhər ərazisindəki Topçubaşov küçəsində baş verib. Qəza zamanı "Hyundai", "Audi" və iki "KİA" markalı minik avtomobili bir-biri ilə toqquşub.

Zəncirvari toqquşma nəticəsində müxtəlif dərəcəli xəsarətlər alan beş nəfər — 2001-ci il təvəllüdlü Aysel Zeynalova, 1961-ci il təvəllüdlü Gülyanaq Hacıyeva, 1983-cü il təvəllüdlü Zənibə Seyidova, eləcə də 2008-ci il təvəllüdlü Sadiq Həsənzadə və Ülvi Quliyev dərhal xəstəxanaya çatdırılıblar.

Yaralılar Naxçıvan Muxtar Respublika Xəstəxanasının Təcili tibbi yardım şöbəsinə yerləşdirilərək həkim nəzarətinə götürülüblər.

Qəzanın baş verdiyi əraziyə dərhal polis əməkdaşları cəlb olunub. Hazırda hadisənin dəqiq səbəblərinin müəyyənləşdirilməsi istiqamətində araşdırmalar davam etdirilir.

Mənbə: Lent.az — Azərbaycan