Texnologiya · 17 oktyabr 2026

“Samsung”un 2027-ci ildə altı yeni qatlanan model çıxaracağı bildirilir

Yayılan iddialara əsasən, “Samsung” 2027-ci ildə qatlanan və genişlənən ekranlı altı fərqli smartfon modelini nümayiş etdirməyə hazırlaşır.

Cənubi Koreya texnologiya nəhəngi “Samsung”un 2027-ci il üçün qatlanan və ekranı genişlənən altı yeni smartfon modeli hazırladığı iddia edilir.

Sızdırılan ilkin məlumatlara görə, təqdim olunacaq cihazlar sırasına “Galaxy Z Fold 9 Pro” modeli və ekran hissəsi sürüşərək açılan “Galaxy Z Slide” qurğusu daxildir.

Bununla yanaşı, istehsalçının portfelində “Galaxy Z Flip 9”, standart “Galaxy Z Fold 9”, həmçinin “Z Fold 9 Ultra” və “Z TriFold 2” modellərinin də yer alacağı irəli sürülür.

Gözləntilərə əsasən, gələcək cihazların texniki təkmilləşdirmələri çərçivəsində batareya ömrünün uzadılması, eləcə də korpus qalınlığının və ümumi çəkinin azaldılması nəzərdə tutulur.

Mənbə: Lent.az — Azərbaycan